OS DE ARRIBA E OS DE ABAIXO

" Existen dous tipos de habitantes:
os de arriba e os de abaixo.
Os de arriba viven igual que os de abaixo
E os de abaixo viven igual que os de arriba,
pero ao revés "

Texto e ilustracións: PALOMA VALDIVIA
Tradución: MANUELA RODRÍGUEZ
Encadernado en cartoné. 22x22 cm.
36 páxinas. Ilustracións en color
Dispoñible en:
-Galego: “Os de arriba e os de abaixo”
Demademora. ISBN 978-84-8464-691-4

Da man da editorial KALANDRAKA chéganos este album con textos e ilustracións que se poden ler en dous sentidos. Está recomendado para lectores a partir de 4 anos. É da autora Paloma Valdivia e destaca pola súa sinxeleza e orixinalidade.

Agardamos que vos guste!

FLOR DE LÚA

Estes días oímos falar moito da lúa porque fixo 40 anos que o home chegou a ela. Non vamos a contar nada novo sobre este feito, pero si queremos compartir unha preciosa composición de Carlos Santana titulada MOONFLOWER ou FLOR DE LÚA. Podédela escoitar mentras ledes estas poesías que tamén teñen como protagonista á LÚA.

O INVERNO ESTÁ PRETO

A lúa está dormida.

A noite está a chamala.

A lúa está roncando.

A noite está enfadada.

Cobren sabas de prata

o seu leito salgado.

Hoxe xa non esperta;

segue cos ollos pechados.

Dorme a lúa no mar.

Sombras voan no ceo.

Pensa a noite,tristeira:

"O inverno xa está preto".

Antonio García Teijeiro."Lueiro de papel"

A LÚA

LÚA QUE SAES DE NOITE NÚA

¿ONDE TES A CASA TÚA?

LÚA NOVA OCULTA NA COVA.

LÚA CRECENTE MÉDRALLE UN DENTE.

LÚA MINGUANTE CAIRO DE ELEFANTE.

LÚA QUE SAES DE NOITE ESPIDA

¿ONDE DORMES DE DÍA?

XOÁN NEIRA."Xiz de cor".

RECORDO DE PABLO NERUDA

Através do buscador Google entérome de que hoxe Pablo Neruda cumpliría 105 anos. Este poeta chileno recibiu o Premio Nobel de Literatura no ano 1971, escribiu uns 40 libros pero acadou a fama con " veinte poemas de amor y una canción desesperada"

Déixovos uns enlaces por si queredes ler poemas deste autor. Premede no título para aceder a esta información.

PABLO NERUDA, TODOS SUS POEMAS

PABLO NERUDA, WIKIPEDIA

PABLO NERUDA

PABLO NERUDA, BIBLIOTECA VIRTUAL CERVANTES

Tamén vos deixo un vídeo de Alex Ubago poñéndolle voz ao Poema xx de Neruda que empeza: Puedo escribir los versos más tristes esta noche... Disfrutade escoitándoo!

MIMOS E AGASALLOS

Acabamos de recibir dous agasallos moi fermosos e orixinais do blog bibliotic e outro xa fai tempo, de duendes juguetones. Un deles celebra as 15.000 visitas do blog, a nós aínda nos faltan moitas para esa cantidade, pero estamos moi contentos de pasar as 4000.

Dámoslles as grazas a estes blogs por acordarse de nós. Como xa son varios os que temos, vamos facer unha presentación con todos eles e subilos na columna dereita do blog.
Queremos compartilos cos nosos seguidores, aínda que algúns xa os teñen, e que son:

• Biblioteca Escolar,
• Curuxa
• Duendes Juguetones
• Yolanda
• Inglishcovas.
• Mik
  Para todos eles unha aperta e grazas por seguirnos.

OS VERMIÑOS DE SEDA

O curso xa rematou, pero aínda temos material que mostrarvos das moitas actividades que ao longo del se fixeron. Esta foi moi interesante: o estudo da metamorfose dos vermes de seda. Os investigadores foron as nenas e nenos de 3 anos, guiados pola súa profe Paquita , que seguiron o proceso destes animaliños día a día con moito interese e curiosidade. Ademais, traballaron nunha páxina que atoparon en internet moi interesante e da que vos deixo o enderezo:

http://calasanz.edu.gva.es/gusanito/bertin/bertin-cientifico.html

Quedaron tan intrigados que dixeron que para o vindeiro curso retomarían o seu traballo. Mentras tanto, aquí vos deixo unhas imaxes e o enlace que podedes consultar e mesmo traballar nel.

Premede na imaxe do vermiño Bertín o tedes o enlace a esa páxina. Así aprenderedes moitas cousas do ciclo da vida dun verme de seda. Tamén volo deixo na parte dereita do blog, en recursos TIC.

Saúdos de PUCA.

O GALEGO SERVE PARA ENTENDERNOS

No blog compañeiro O segrel do Penedo, que á súa vez a recolleu do blog Brétemas, leo este fermoso texto de José Manuel Atanes Limia publicado na sección de «Cartas» no xornal Faro de Vigo, onde se explica moi ben para que serve o galego. Lédea e veredes que clariña é, logo si vos apetece, sumádevos a proposta que se nos fai, a de aumentar a carta con:

" esas palabras marabillosas que nos axudan a entendernos"

O GALEGO SERVE PARA ENTENDERNOS!!!
Puxémoslle nome ás persoas: Suso, Maruxa, Mariña... apelido: Vázquez, Nogueira, Lagoa....

e alcume: o Bichoguizo, a Rachaoferro, as Piricas,....
Puxémoslle nome ás nosas árbores: amieiro, freixo, teixo,... e apelidos: Carballa da Rocha, Castiñeiro da Capela, Carballeira de Mandiá...

Botamos aturuxos, arroutadas, regueifas.... e damos colo, apertas, bicos....

Puxémoslle nome ás froitas: pexego, mazá, abruño....

Aos arbustos: silva, xesta, piornos....

Ás nosas herbas: camariña, herba de namorar, fiuncho...

Ás comidas: grelos, cacheira, cachelos...

Puxémoslle nome aos insectos: vagalume, escornabois, avelaiña...

Aos peixes: xouba, ollomol, merlón .... e aos mariscos: vieira, zamburiña, navallas....

Ás nosas praias: de Rodas, A Rapadoira, Ponzos...

Ás serras: O Larouco, A Capelada, Outes...

Aos montes: A Zapateira, O Galiñeiro, A Bailadora...

As rochas: Pena Corneira, A Pedra de Avalar, Os Cabalos...

Aos ríos: Toxa, Xallas, Eume, ...

Aos pobos: Soutelo, Peroxa, Lubre...

Aos males: Mal de Ollo, O Arangaño, O folgosalvo...

Aos nosos medos: A Santa Compaña, O Negro Meigallo, O home do saco...

Aos nosos heroes: O Foucellas, Roi Xordo, María Soliña...

Aos monstros: Sacauntos, Fendetestas, Urco...

As vacas: Marela, Xeitosa, Roxa, ....

Aos disfraces: Peliqueiro, Boteiro, Choqueiro...

Aos sentimentos: morriña, agarimo, aloumiño...

Aos santos: A Franqueira, O Corpiño, San Andrés..

Ás nosas festas: A Rapa das Bestas, O Magosto, Os Maios...

Á musica: os alalás, a chouteira, as folías...

Aos xogos: a billarda, a porca, as lombas, ...

Ás partes do corpo: as costas, os xeonllos, os beizos...

Aos paxaros: paporrubio, rula, xílgaro...

Ao vestido: saia, polaina, pololos...

e agora veñen que para que serve o galego, pois e obvio, para entendernos.

E esta é a nosa aportación:

Puxémoslle nome as partes do carro: sabexugueiro, chavella, fungueiros, caínzas,...

Inventamos verbos: acabicornar as vacas, rapar a lá das ovellas ou o mel das abellas...

Puxémoslle nome as partes da lareira:camballeira, fornela, tres pes...

¿Queres continuala? Pois veña, adiante!