BIBLIOCERVO: DÍA DA ARTE GALEGA NA ESCOLA

31 may 2021

DÍA DA ARTE GALEGA NA ESCOLA

Dende os primeiros proxectos de arte no colexio nos que establecemos o Día 1 de xuño como o DÍA DA ARTE GALEGA NA ESCOLA en lembranza do nacemento de Luís Seoane, un dos fundadores da Cerámica de Sargadelos xunto con Isaac Díaz Pardo, cada 1 de xuño celebramos este día adicándollo a unha expresión artística diferente.

Nesta ocasión ímosvos propoñer un achegamento ao "OFICIO DE CREBEIRO".

Seguro que algunha vez escoitastes a expresión " ANDAR ÁS CREBAS"

PERO QUE É UN CREBEIRO E QUE SIGNIFICA ESA EXPRESIÓN TAN GALEGA?

Un CREBEIRO é unha persoa que busca e aproveita restos de naufraxios ou cargas de embarcacións que o mar arrastra ata a costa para realizar diferentes pezas artísticas.

Non vos parece do máis interesante? Entón ... que son as CREBAS?

CREBAS é un termo propio do vocabulario da Costa da Morte, que nomea a todos aqueles obxectos que as mareas depositan na praia, a consecuencia dun naufraxio, temporal ou outras circunstancias.

Entón ... contádeme! Algunha vez vós ANDASTES ÁS CREBAS? Se non o fixestes agora é o momento!

PROPOSTA: Queremos animarvos a que, aproveitando o bo tempo, saiades de paseo á praia e recollades nunha bolsiña aqueles obxectos que vos parezan de interese e que foron arrastrados polo mar, para logo construír coa axuda da vosa familia unha pequena OBRA DE ARTE! Despois podedes compartila a través do twitter @CEIP_de_CERVO ou cos vosos titores e titoras.

Ademais estaredes axudando a manter limpa a nosa contorna e a fomentar a RECICLAXE e a REUTILIZACIÓN!

A modo de exemplo déixovos aquí algunha foto de obras artísticas feitas por http://gorgesleal.blogspot.com/ con esta técnica. Como vedes só tedes que deixar voar a vosa imaxinación!

Outra persoa que destacou nesta disciplina foi MAN: O CREBEIRO ARTISTA de CAMELLE. Nas seguintes ligazóns podedes obter máis información sobre este artista tan especial, e quizáis as súas obras podan ser fonte de inspiración. E recordade que si pasades por CAMELLE, non deixedes de visitar o MUSEO DO ALEMÁN!